Image credit :www.freepik.com

പ്ലാസ്റ്റിക് സര്‍ജറി,സൗന്ദര്യ സംരക്ഷണം, നിങ്ങള്‍ അറിയേണ്ട ചില കാര്യങ്ങള്‍ നമുക്ക് സുപരിചതമായ ശസ്ത്രക്രിയയാണ് പ്ലാസ്റ്റിക് സര്‍ജറി. സിനിമാ താരങ്ങളുള്‍പ്പെടെ പലരും പ്ലാസ്റ്റിക് സര്‍ജറി ചെയ്തതിന്‍റെ വാര്‍ത്തകള്‍ അറിയാറുമുണ്ട്. പ്ലാസ്റ്റിക് സര്‍ജറി എന്നാല്‍ എന്താണ്? ഇതിന് എന്തെങ്കിലും ദോഷവശങ്ങള്‍ ഉണ്ടോ?മനുഷ്യശരീരത്തിലെ ഏതെങ്കിലും ഒരു ഭാഗത്തിൻറെയോ അവയവത്തിന്‍റെയോ പുനഃസ്ഥാപനം അല്ലെങ്കില്‍ പുനർനിർമ്മാണമോ മാറ്റമോ ഉൾപ്പെടുന്ന ഒരു ശസ്ത്രക്രിയയാണ് പ്ലാസ്റ്റിക് സർജറി.പ്ലാസ്റ്റിക് സര്‍ജറിയെ രണ്ടായി തിരിക്കാം. പുനർനിർമാണ ശസ്ത്രക്രിയയും സൗന്ദര്യവർദ്ധക ശസ്ത്രക്രിയയും. ശരീരത്തിന്റെ ഒരു ഭാഗത്ത് നിന്ന് കോശങ്ങളോ കൃത്രിമ ഇംപ്ലാന്റുകളോ വെച്ചുപിടിപ്പിച്ച് വൈകല്യം സംഭവിച്ച ഭാഗം പഴയ സ്ഥിതിയിലാക്കുന്നതാണ് പുനര്‍നിര്‍മാണ ശസ്ത്രക്രിയ. ക്രാനിയോഫേഷ്യല്‍ ശസ്ത്രക്രിയ, കൈ ശസ്ത്രക്രിയ, മൈക്രോസര്‍ജറി, പൊള്ളല്‍ ചികിത്സ എന്നിവ അടങ്ങുന്നതാണ് പുനര്‍നിര്‍മാണ ശസ്ത്രക്രിയ. ശരീരത്തിന്റെ രൂപഭംഗി മെച്ചപ്പെടുത്താനാണ് കോസ്‌മെറ്റിക് ശസ്ത്രക്രിയ നടത്തുന്നത്. ബിസി 800ഓടെ പുനര്‍നിര്‍മാണ ശസ്ത്രക്രിയാ രീതികള്‍ ഇന്ത്യയില്‍ പ്രചാരത്തിലുള്ളതായി കണക്കാക്കപ്പെടുന്നു. തകര്‍ന്ന മൂക്ക് ശരിയാക്കാനുള്ള ചികിത്സകള്‍ ആദ്യം പരാമര്‍ശിക്കുന്നത് എഡ്വിന്‍ സ്മിത്ത് പാപ്പിറസിലാണ്. ആധുനിക പ്ലാസ്റ്റിക് സര്‍ജറിയുടെ പിതാവായി കണക്കാക്കപ്പെടുന്നത് സര്‍ ഹരോള്‍ഡ് ഗില്ലീസിനെ ആണ്. ലണ്ടനില്‍ ജോലി ചെയ്യുന്ന ന്യൂസിലാന്‍ഡ് ഓട്ടോലാറിംഗോളജിസ്റ്റ് ആയ അദ്ദേഹം ഒന്നാം ലോകമഹായുദ്ധ കാലത്ത് മുഖത്തെ മുറിവുകള്‍ കൊണ്ട് പ്രയാസം അനുഭവിക്കുന്ന സൈനികരെ പരിചരിക്കുന്നതില്‍ ആധുനിക ഫേഷ്യല്‍ ശസ്ത്രക്രിയയുടെ പല സാങ്കേതിക വിദ്യകളും വികസിപ്പിച്ചെടുത്തിരുന്നു.രൂപം മെച്ചപ്പെടുത്താനായാണ് പ്ലാസ്റ്റിക് സര്‍ജറിയുടെ കേ്ന്ദ്ര ഘടകമായ സൗന്ദര്യവര്‍ധക ശസ്ത്രക്രിയ. പൊള്ളലേറ്റ ഉടനെ നടത്തുന്ന ചികിത്സയാണ് അക്യൂട്ട് ബേണ്‍ സര്‍ജറി.

പൊള്ളലേറ്റ മുറിവുകള്‍ സുഖപ്പെട്ടതിന് ശേഷമാണ് പുനര്‍നിര്‍മാണ ശസ്ത്രക്രിയ നടത്തുക. ക്രേനിയോഫേഷ്യല്‍ ശസ്ത്രക്രിയയെ രണ്ടായി തിരിച്ചിരിക്കുന്നു. ക്രേനിയോഫേഷ്യല്‍ അസ്ഥികൂടത്തിന്റെയും മൃദുവായ ടിഷ്യുകളുടെയും ജനന വൈകല്യങ്ങളുടെയും ചികിത്സയെ സംബന്ധിച്ചുള്ളതാണ് കുട്ടികള്‍ക്കുള്ള പീഡിയാട്രിക് ക്രേനിയോഫേഷ്യല്‍ ശസ്ത്രക്രിയ. മുതിര്‍ന്നവര്‍ക്കുള്ളതാണ് അഡള്‍ട്ട് ക്രേനിയോഫേഷ്യല്‍ ശസ്ത്രക്രിയ.

ഗുരുതര പരിക്കുകള്‍, കൈയ്യുടെയും കൈത്തണ്ടയുടെയും വിട്ടുമാറാത്ത രോഗങ്ങള്‍, പെരിഫറല്‍ നാഡി പ്രശ്‌നങ്ങള്‍ എന്നിവയുമായി ബന്ധപ്പെട്ടതാണ് ഹാന്‍ഡ് സര്‍കറി. ടിഷ്യുവിന്റെ ഒരു ഭാഗം പുനര്‍നിര്‍മാണ സ്ഥലത്തേക്ക് മാറ്റുകയും രക്തക്കുഴലുകള്‍ വീണ്ടും ബന്ധിപ്പിക്കുകയും ചെയ്യുന്നത് മൈക്രോസര്‍ജറിയില്‍പ്പെടുന്നു.ത്വക്കിലെ ടിഷ്യു മാറ്റി സ്ഥാപിക്കുന്നത്(സ്‌കിന്‍ ഗ്രാഫ്റ്റിങ്) പ്ലാസ്റ്റിക് സര്‍ജറിയിലെ സാധാരണ പ്രക്രിയയാണ്. സ്‌കിന്‍ ഗ്രാഫ്റ്റുകള്‍സ്വീകര്‍ത്താവില്‍ നിന്ന് എടുക്കുന്നതാണ് ഓട്ടോഗ്രാഫ്റ്റ്. ഒരേ ഇനം ദാതാക്കളില്‍ നിന്നാണെങ്കില്‍ ഇതിനെ അലോഗ്രാഫ്റ്റുകള്‍ എന്നും വ്യത്യസ്ത ഇനമാണെങ്കില്‍ സീനോഗ്രാഫ്റ്റുകള്‍ എന്നും വിളിക്കുന്നു. അബ്‌ഡോമിനോപ്ലാസ്റ്റി(ടമ്മി ടക്ക്) എന്നറിയപ്പെടുന്ന അടിവയറ്റിലെ രൂപമാറ്റം, കണ്‍പോളകളുടെ ശസ്ത്രക്രിയയായ ബ്ലെഫറോപ്ലാസ്റ്റി, പെനൈല്‍ സര്‍ജറി അഥവാ ഫാലോപ്ലാസ്റ്റി, മാമോപ്ലാസ്റ്റി, ബട്ട് ഇംപ്ലാന്റ്, ക്രയോലിപോളിസിസ്, ലിപ് ഓഗ്മെന്റേഷന്‍, ചൈലോപ്ലാസ്റ്റി, ഓട്ടോപ്ലാസ്റ്റി എന്നിവ ജനപ്രിയമായ ചില സൗന്ദര്യ വര്‍ധക ശസ്ത്രക്രിയകളില്‍പ്പെടുന്നു.